Plantun de Prouvènço

Pèr coumpara dos planto d'encò nostre

Muscari neglectum & Scleranthus annuus

Barralet

Muscari neglectum

Asparagaceae Hyacinthaceae

Àutri noum : Couquiéu, Couguiéu, Pourriòu, Aiet-di-chin.

Noms en français : Muscari en grappe, Muscari négligé.

Descripcioun :
Lou barralet flouris d'ouro à la primo e se recounèis eisa à si flouquet de bèlli flour bluio pu longo que larjo. Li fueio, un pau redouno, soun proun longo e rebalon au sòu ço que permes de lou destria de soun cousin, lou barralet-pichot, Muscari botryoides. Coumpara emé lou barralet-pichot que ié sèmblo proun.

Usanço :
B. Remuzat raporto : "L'a un peÏsan dóu Var que m'a di que, quand èro pichoun, si servié dei barralet pèr tigne en blu leis uou de Pasco". Li cabosso se manjon cuecho en liéume. Èi poussible de tasta li jóuini fueio e li flour.

Port : Erbo
Taio : 10 à 25 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Muscari
Famiho : Asparagaceae
Famiho classico : Hyacinthaceae

Ordre : Asparagales

Coulour de la flour : Bluio
Petalo : 6
Ø (o loungour) flour : 0,5 à 1 cm
Flourido : Printems Ivèr

Sòu : Ca
Autour basso e auto : 0 à 1800 m
Aparado : Noun
Febrié à jun

Liò : Champ - Roucaio - Ermas - Tepiero seco
Estànci : Termoumediterran à Mountagnard
Couroulougi : Eurimediterrano
Ref. sc. : Muscari neglectum Guss. ex Ten., 1842

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.